مولوي محمد ابراھيم انيس مهيري

مولوي محمد ابراهيم ’انيس‘ مهيري: مشھور شاعر، استاد ۽ ديني عالم. ’انيس‘ مھيري جو اصل نالو مولوي محمد ابراهيم ولد حاجي غلام حسين مھيري هو. سندس پيدائش 15 مارچ 1918ع تي ڳوٺ ٻاگهلي (ڪڙئي گھنور کان 5-6 ميل اتر طرف)، تعلقي گولاڙچي (شھيد فاضل راهو) ضلعي بدين ۾ ٿي. هي اڃا پنجن سالن جو هو ته سندس والد ڦورن هٿان هڪ حادثي ۾ شھيد ٿي ويو. 1938ع ۾ هي ٻاگهلي مان لڏي ڳوٺ مولوي علي محمد مھيري (سنھڙو شريف) ۾ اچي آباد ٿيو. قرآن مجيد حافظ محمد خان پنھور وٽ پڙهيو. سنڌي فائنل امتحان پاس ڪرڻ کانپوءِ، سجاول جي مدرسي مان ديني تعليم حاصل ڪئي، وڌيڪ ديني تعليم ڪراچي ۾ مولوي محمد صادق کڏي واري جي مدرسي ۽ ڊاڀيل گجرات مان حاصل ڪئي. مسلم اسڪول ۾ استاد مقرر ٿيو. سنڌي فارسي ۽ عربي جو عالم، بھترين شاعر ۽ اديب ٿي گذريو. سندس ڇپيل ڪتابن ۾: (1) ’جرنيل اعظم‘ (بن وليد'>خالد بن وليد)، (2) ’اصول نجات‘، (3)آسان تفسير‘ ۽ (4) ’مفيد الوارثين‘ (وارثن لاءِ قانون) شامل آهن.. هن شاعريءَ جو به هڪ مسودو تيار ڪيو، جيڪو هن وقت اڻلڀ آهي. مولوي ’انيس‘ مھيري آگسٽ 1994ع ڌاري ڳوٺ علي محمد مھيري ۾ وفات ڪئي. ٻاگهليءَ جي اباڻي قبرستان ۾ دفن ٿيو.

داخلا ۾ استعمال ٿيل تاريخون

1918.03.15  عيسوي

مولوي محمد ابراھيم ’انيس‘ مهيري 15 مارچ 1918ع تي ٽنڊي محمد خان ۾ ڄائو

شخصيتون - ڀاڱي جون ٻِيون داخلائون